Прысуд Мікіту Ліхавіду пакінулі без зменаў
41- 30.04.2011, 21:46

Менгарсуд пакінуў без змены прысуд актывісту руху «За свабоду» Мікіту Ліхавіду.
29 красавіка ў Менскім гарадскім судзе разглядалася скарга Мікіты Ліхавіда на прысуд Партызанскага суду, паводле якога актывіста асудзілі на 3,5 гады пазбаўлення волі. Вынік - прысуд пакінулі без зменаў. «Адвакатка хадайнічала, каб Мікіту прывезлі ў суд. Суддзі параіліся хвіліну і адмовілі», - паведаміла «Радыё Свабода» маці актывіста Алена Ліхавід.
«Потым стала выступаць адвакатка. Больш за гадзіну яна казала, вельмі пераканаўча даказвала, што прысуд трэба адмяніць. Я паглядзела на аднаго з суддзяў, і ў нейкі момант мне падалося, што вось яно! На ягоным твары нібыта было напісана, што ён усё разумее і з усім згодны. Але яны зноў пайшлі ў пакой для нарад, і калі праз 20 хвілін выйшлі, то я зразумела, што надзея была прывідная», - кажа жанчына.
Мікіту Ліхавіда, па словах маці палітвязня, адправяць па этапе ў калонію ў Наваполацк 7 мая. Да таго часу Алена Ліхавід спадзяецца яшчэ атрымаць спатканне з сынам на «Валадарцы».