Bloomberg: У Кітаі з пачатку снежня кавідам заразіліся 248 мільёнаў чалавек

Гэта амаль 18 адсоткаў насельніцтва.

Успышка COVID-19 прадаўжае лютаваць у Кітаі, колькасць захварэлых дасягнула беспрэцэдэнтнага маштабу.

Пасля зняцця жорсткіх кавідных абмежаванняў за першыя 20 дзён снежня 248 млн чалавек у Кітаі заразіліся каранавірусам. Гэта амаль 18 адсоткаў насельніцтва. Пра гэта піша Bloomberg са спасылкай на прадстаўлены на закрытай нарадзе ў сераду 21 снежня пратакол паседжання Нацыянальнай камісіі аховы здароўя Кітая.

На гэтым тыдні, 20 снежня, пастаўлены новы антырэкорд колькасці тых, хто заразіўся за адзін дзень – 37 млн чалавек. Гэта беспрэцэдэнтны лік за ўвесь час пандэміі. Папярэдні максімальны прырост хворых быў зафіксаваны ў студзені 2022 года, тады за дзень заразіліся 4 млн чалавек.

Лічбы моцна адрозніваюцца ад афіцыйных звестак, якія публікуюць улады Кітая. 21 снежня ўрад даў справаздачу аб 2996 хворых і ўсяго аб 10 смерцях з пачатку снежня.

Акрамя таго, са снежня Кітай не дае справаздачу перад САЗ – краіна перастала перасылаць звесткі пра шпіталізацыі з COVID-19.

Вірус распаўсюджваецца на фоне зняцця часткі каранавірусных абмежаванняў. Цягам усіх трох гадоў з пачатку пандэміі ў Кітаі дзейнічаў жорсткі каранцін, так званая палітыка "нулявой цярпімасці". Людзі былі змушаныя месяцамі сядзець у сваіх кватэрах. У некаторых гарадах паліцыя блакавала выхады са шматкватэрных дамоў.

Напрыканцы лістапада жыхары Кітая, якія стаміліся ад бесперапыннага каранціну, упершыню за 30 гадоў арганізавалі масавы пратэст супраць палітыкі "нулявой цярпімасці". Дэманстрацыі распаўсюдзіліся на такія буйныя гарады, як Нанкін, Ухань, Гуанчжоу, Пекін, Шанхай.

У выніку ўлады пайшлі на саступкі: яны змякчылі шэраг каранцінных захадаў. Некаторым хворым дазволілі лячыцца на каранціне дома, а не выпраўляцца ў цэнтралізаваныя лагеры. Улады таксама скасавалі патрабаванні да тэставання для ўваходу ў большасць грамадскіх месцаў.

Змякчэнне кавідных абмежаванняў чакана прывяло да бесперашкоднага распаўсюджвання вірусу. Калектыўны імунітэт у Кітаі праз каранцін выпрацоўваўся ў асноўным за кошт вакцынаў. Аднак яны менш эфектыўныя супраць новых штамаў.

Амікрон практычна бесперашкодна распаўсюдзіўся сярод жыхароў з нізкім узроўнем натуральнага імунітэту. Лякарні не паспелі падрыхтавацца да такога наплыву хворых.

Успышка каранавірусу ў Кітаі паўплывае на Расею. Кітай сёлета стаў адным з асноўных спажыўцоў расейскай нафты. Праз запаволенне кітайскай эканомікі знізіцца попыт на сыравіну з Расеі, ад якой залежаць прыбыткі бюджэту.