Махлярства ад Міністэрства аховы здароўя

Чаму ў Беларусі не робяць тэсты на COVID-19?

Памятаючы аб загадзе Міністэрства аховы здароўя больш не выконваць тэсты на ковід людзям, якія звяртаюцца ў паліклініку з сімптомамі ВРВІ, паўстала лагічнае пытанне, як жа, уласна кажучы, выстаўляецца дыягназ і які код ставіцца ў лістку непрацаздольнасці?

Міністэрства аховы здароўя, нагадаем, загадала выстаўляць «па сімптаматыцы» ці, прасцей кажучы, «на вока».

Telegram-канал «Белыя халаты» паразмаўляў з медыкамі, якія працуюць у амбулаторным звяне. Каб крыху растлумачылі сітуацыю.

У некаторых паліклініках пакуль што яшчэ прадаўжаюць тэставаць хворых, але далёка не ва ўсіх. Тэсты, як правіла, выконваюцца пацыентам з цяжэйшай хваробай, якія патрабуюць шпіталізацыі ў стацыянар.

Такім чынам, як можа быць выстаўлены дыягназ «Каранавірусная інфекцыя», які мае код В34.2?

Самае простае: пацыент прыходзіць з ужо выкананым у прыватнай лабараторыі тэстам на ковід і з паперай, якая пацвярджае гэта.

Пацыент прыходзіць з клінікай ВРВІ і антыгенным тэстам з дзвюма палоскамі. Антыгенныя тэсты набываюцца ў аптэках і выконваюцца самастойна.

Пацыент прыходзіць з клінікай ВРВІ і паведамляе аб тым, што кантактаваў з хворым чалавекам з пацверджаным ковідам.

Самае складанае: выстаўленне ковіда толькі па скаргах на выяўленую слабасць, высокую тэмпературу, галаўны боль, раздражнёнае горла.

У апошнім выпадку ковід, імаверней за ўсё, будзе выстаўлены не ўсім пацыентам, якія хварэюць на ковід, бо няма аб'ектыўнага лабараторнага пацверджання дыягназу, а клінічная карціна захворвання, выкліканага омікронам не мае істотных і прынцыповых адрозненняў ад класічнай ВРВІ, згодна з якімі можна было б дакладна сказаць, што ў чалавека менавіта ковід.

З эпідэміялагічнага пункту гледжання сёння амаль кожны выпадак ВРВІ можа апынуцца ковід з прычыны высокай кантагіёзнасці омікрону. Аднак, выстаўленне дыягназу без лабараторнага пацверджання наяўнасці ў арганізме канкрэтнага ўзбуджальніка - гэта ўсё ж крыху контрнавукова.

Цешыць тое, што шматлікія пацыенты прыходзяць на прыём з ужо выкананымі тэстамі на ковід, што дазваляе лекарам выстаўляць дакладны дыягназ.

Што да статыстыкі, то ўсе выстаўленыя (не важна, з тэстам, або без) выпадкі каранавіруснай інфекцыі, выстаўленыя за дзень, збіраюцца ў агульны спіс і перадаюцца для агульнай справаздачнасці.

Што з гэтымі спісамі адбываецца на ўзроўні Міністэрства аховы здароўя - невядома.

Можна было б выказаць здагадку, што загад выстаўляць дыягназ «ковід» без тэстаў - гэта добрая ідэя з боку Міністэрства аховы здароўя, закліканая спрасціць працу медыкам, але нам бачыцца гэта толькі спрашчэннем магчымасці для махлярства звесткамі ў ковіднай статыстыцы.

Нарэшце, нашмат прасцейшым выйсцем было б забеспячэнне медыкаў на месцах запасамі антыгенных тэстаў. Тады пацыент, які прыйшоў на прыём, адразу зрабіў бы тэст і, за час, пакуль праходзіць медычнае апытанне і агляд хворага, вынік тэсту быў бы гатовы. Як вядома, антыгенныя тэсты даюць станоўчы вынік прыкладна з нулявога дня хваробы - тады, калі з'яўляюцца першыя сімптомы.

Забеспячэнне антыгеннымі тэстамі паліклінік і супермаркетаў, тэставанне на працоўных месцах, мабільныя пункты тэставання таксама сур'ёзна спрасцілі б пытанне выстаўлення дыягназу хвораму чалавеку, які прыйшоў у паліклініку.