Успышка ковід пакінула шэраг гарадоў амаль без грамадскага транспарту

Многія работнікі не могуць патрапіць на свае прадпрыемствы.

У Светлагорску касуюцца аўтобусныя рэйсы, людзі не могуць даехаць да працы, паведамляе ranak.me.

У тым ліку работнікі не могуць патрапіць на шматпакутны цэлюлозна-кардонны камбінат (ЦКК), пабудаваны за кітайскі крэдыт.

У адміністрацыі ЦКК тлумачаць, што ва ўсім вінаваты каранавірус: «На працу выйшла толькі бязмала 30% кіроўцаў аўтапарка».

«Нам давядзецца найбліжэйшым часам дабірацца на працу і з працы ўсімі даступнымі сродкамі, у тым ліку і на таксоўцы», — дадаюць у ЦКК. І просяць супрацоўнікаў насіць маскі, бо спыняць вытворчасць нельга.

Такая сітуацыя і ў Рагачове.

Як паведамляла «Еўрарадыё», такая ж «ковідна-транспартная» праблема ўзнікла і ў Магілёве. Каб дабрацца на працу, магілёўцам дазволілі ездзіць на аўтобусах з тралейбуснымі праязнымі, а на тралейбусах - з аўтобуснымі.