AP: Трамп можа дзейнічаць метадам «бізуна і перніка»
4- 19.01.2025, 13:32
- 3,186
Перспектывы міру ва Украіне туманныя.
Перспектывы мірнага ўрэгулявання вайны ва Украіне застаюцца нявызначанымі, нягледзячы на заявы абранага прэзідэнта ЗША Дональда Трампа аб магчымасці дасягнуць пагаднення, піша Associated Press.
Пакуль Трамп рыхтуецца ўступіць на пасаду, абодва бакі канфлікту ўзмацняюць свае пазіцыі на полі бою, спрабуючы ўмацаваць уплыў перад патэнцыйнымі перамовамі.
Абодва бакі занялі жорсткія перамоўныя пазіцыі, якія пакідаюць мала месца для кампрамісаў. Расея, якая кантралюе прыкладна 20% тэрыторыі Украіны, у тым ліку незаконна анэксаваны Крым, захоўвае ініцыятыву на полі бою, што асабліва выявілася ў значных дасягненнях увосень 2024 года.
Украіна, сутыкнуўшыся з дэфіцытам працоўнай сілы, адчувае цяжкасці з папаўненнем сваіх вайсковых рэзерваў. Згодна з аналізам Майкла Кофмана, зніжэнне ўзроўню мабілізацыі і памяншэнне камплектнасці пяхотных падраздзяленняў ставяць пад пагрозу здольнасць Украіны супрацьстаяць працягламу ціску.
Тактыка бакоў
Маскоўскі вайсковец аналітык Сяргей Палятаеў адзначае, што Расея засяроджваецца на павольным і паступовым пасоўванні на фронце, робячы стаўку на фізічнае знясіленне ўкраінскага войска і палітычны крах Украіны. У той жа час Расея працягвае дамагацца гарантый ад Захаду, прынамсі, наконт таго, што Украіна ніколі не стане сябрам NATO, і патрабуе ўвядзення палітыкі, якая б замацавала яе ўплыў у Кіеве.
Трамп выказаў намер дасягнуць пагаднення цягам шасці месяцаў пасля ўступлення на пасаду. Яго намінант на пасаду спецпрадстаўніка ва Украіне Кіт Келаг спадзяецца на магчымасць падпісання пагаднення за 100 дзён. Адміністрацыя Трампа, як сцвярджаюць яе прадстаўнікі, мае намер узмацняць ціск на Расею, калі Масква не пойдзе на спыненне ваенных дзеянняў.
Курт Волкер, былы спецыяльны прадстаўнік ЗША ў пытаннях Украіны, мяркуе, што Трамп можа выкарыстаць стратэгію «бізуна і перніка»: пашырыць падтрымку Украіны, у тым ліку праз фінансаванне і пастаўкі зброі, адначасова ўзмацняючы санкцыі супраць расейскай эканомікі.
Імавернасць мірнага ўрэгулявання
Эксперты, аднак, сумняваюцца ў гатоўнасці Пуціна ісці на кампрамісы. На думку Таццяны Станавой з Цэнтра Расеі і Еўразіі Карнэгі, патрабаванні Расеі да Украіны ўключаюць не толькі скарачэнне ўзброеных сіл, але і гарантыі, што Захад не пераўзброіць Кіеў.
«Масква разглядае ўсякую вайсковую падтрымку Украіны як асабліва варожую», - адзначыла яна, мяркуючы, што Расея, хутчэй за ўсё, працягне ціск і ваенныя дзеянні, чым пагодзіцца на мірныя саступкі.
Агенцтва мяркуе, што ў гэтых варунках перспектывы дасягнення хуткага міру застаюцца сумнеўнымі, а канфлікт, імаверна, будзе працягвацца да змены сітуацыі на полі бою або міжнароднай палітычнай кан'юнктуры.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
