Банк Расеі ўзмацняе кантроль і абмяжоўвае свабоду расейцаў

РФ знаходзіцца ў стане ўнутранага фінансавага крызісу.

Адным з ключавых складнікаў ідэалагічнай машыны РФ з'яўляецца стварэнне ілюзіі эканамічнай стабільнасці і фінансавай незалежнасці. Крэмль спрабуе пераканаць як уласнае насельніцтва, так і міжнародную супольнасць у тым, што расейская эканоміка працягвае расці, нягледзячы на санкцыі, вайну і міжнародную ізаляцыю. Аднак, калі паглядзець на рэальныя эканамічныя крокі Банка Расеі, то сітуацыя выглядае зусім інакш.

Нядаўна ў расейскіх тэлеграм-каналах быў апублікаваны праект змен у грашова-крэдытную палітыку РФ на 2025-2027 гады, які дэманструе, што фінансавая сістэма краіны знаходзіцца ў крызісе, а дзяржава змушаная звяртацца да прымусовых захадаў, каб падтрымліваць яе на плыву. Гэтыя захады не толькі супярэчаць прынцыпам рынкавай эканомікі, але і проста паказваюць на панічныя настроі ва ўладных колах.

Па-першае, Банк Расеі плануе значнае падвышэнне тарыфаў на фінансавыя паслугі, прынамсі, на пераводы сродкаў і карыстанне аплатнай інфраструктурай. Афіцыйнае абгрунтаванне гэтай пастановы - рост аперацыйных выдаткаў і неабходнасць мадэрнізацыі сістэмы.

Аднак сапраўдная прычына ў іншым: такім чынам дзяржава спрабуе кампенсаваць страты бюджэту, якія растуць праз вайну і санкцыі.

Павелічэнне кошту фінансавых паслуг ударыць па шараговых грамадзянах і бізнэсу, прымушаючы іх плаціць за пралікі ўлады.

Па-другое, у дакуменце змяшчаюцца жорсткія абмежаванні на вывад сродкаў за мяжу. Прадугледжваецца, што фізічныя і юрыдычныя асобы змогуць ажыццяўляць міжнародныя пераводы толькі ў межах устаноўленых лімітаў, а некаторыя транзакцыі ўвогуле будуць забароненыя. Гэта наўпроставы довад таго, што расейскі рэжым баіцца адтоку капіталу і спрабуе ўсімі метадамі ўтрымаць грошы ўнутры краіны. Калі эканоміка стабільная, дык навошта тады ўводзіць такія абмежаванні?

Яшчэ адным важным момантам з'яўляецца прымусовае замяшчэнне актываў банкаў і фінансавых устаноў дзяржаўнымі аблігацыямі. Гэта азначае, што частка сродкаў, якія маглі б пайсці на крэдытаванне бізнэсу ці іншыя інвестыцыйныя праекты, будзе накіраваная на фінансаванне дзяржаўнай пазыкі. Фактычна, урад прымушае фінансавы сектар крэдытаваць вайну і дэфіцытны бюджэт. Гэты крок толькі ўзмоцніць стагнацыю эканомікі, зменшыць даступнасць крэдытаў і створыць дадатковыя рызыкі для банкаўскай сістэмы.

Каб схаваць рэальныя праблемы, Банк Расеі заяўляе, што ключавая стаўка застанецца нязменнай для нібыта стабілізацыі эканомікі. Аднак на практыцы гэта толькі спроба пазбегнуць панікі сярод бізнэсу і насельніцтва, бо ўсякае значнае падвышэнне стаўкі можа стаць сігналам аб яшчэ большых праблемах у эканоміцы.

Такім чынам, аналіз новых захадаў Банка Расеі паказвае, што эканамічная сітуацыя ў краіне далёкая ад заяўленай стабільнасці. Дзяржава ўводзіць новыя падаткі ў выглядзе падвышаных тарыфаў, абмяжоўвае фінансавую свабоду грамадзян, прымушае банкі набываць дзяржаўныя пазыковыя абавязацельствы і спрабуе ўтрымаць бачнасць кантролю, калі насамрэч фінансавая сістэма РФ усё больш нагадвае картачны домік.

Усё гэта яшчэ раз даводзіць, што расейская эканоміка трымаецца не на рэальным развіцці, а на адміністрацыйным ціску і прымусовых захадах.

Такая палітыка не можа быць доўгатэрміновай, і з цягам часу яе наступствы стануць яшчэ больш разбуральнымі для самой РФ. Менавіта гэтыя факты павінна даносіць Украіна міжнароднай супольнасці, разбураючы міф аб «эканамічнай моцы» Расеі, якая насамрэч знаходзіцца ў стане ўнутранага фінансавага крызісу.

Іван Вус, к.э.н., галоўны кансультант украінскага цэнтра замежнапалітычных даследаванняў Нацыянальнага інстытута стратэгічных даследаванняў, «Уніян»

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]