ЕЗ рыхтуе новы пакет дапамогі Украіне

На 6 млрд еўраў.

Краіны Еўразвязу плануюць вылучыць Украіне пакет ваеннай дапамогі памерам не меншым за 6 мільярдаў еўраў. Пра гэта піша Politico са спасылкай на трох еўрапейскіх дыпламатаў. Сродкі будуць накіраваныя на ўмацаванне стратэгічных пазіцый Кіева перад пачаткам перамоваў з Расеяй. Прадугледжваецца, што пакет будзе ўключаць шырокі спектр ваеннай падтрымкі: ад пастаўкі 1,5 мільёна артылерыйскіх снарадаў да сучасных сістэмаў супрацьпаветранай абароны. Гэта можа стаць адным з найбуйнейшых пакетаў ваеннай дапамогі ЕЗ з пачатку поўнамаштабнага ўварвання Расеі. Як чакаецца, план дапамогі будзе прапанаваны падчас сімвалічнага візіту еўрапейскіх чыноўнікаў у Кіеў, прызначанага на 24 лютага.

Двое дыпламатаў падкрэслілі, што 6 мільярдаў еўраў разглядаюцца як адпраўны пункт. Агульны памер можа быць павялічаны да 10 мільярдаў еўраў ці нават больш, паколькі краіны ЕЗ прадаўжаюць аналізаваць свае магчымасці, каб вызначыць, якія рэсурсы могуць быць скіраваныя Украіне. Акрамя таго, дзяржавы – чальцы блока могуць уносіць як матэрыяльныя, так і фінансавыя сродкі, прычым памер фінансавага ўнёску будзе залежаць ад іх валавога нацыянальнага прыбытку, адзначыла адна з крыніцаў.

Падрыхтоўка такога маштабнага пакету стане сведчаннем катэгарычнасці ЕЗ падтрымліваць Украіну, асабліва на фоне распачатых паміж ЗША і Расеяй двухбаковых перамоваў аб заканчэнні вайны ва Украіне, на якія не былі запрошаныя ўкраінскія і еўрапейскія прадстаўнікі. Павелічэнне ваеннай падтрымкі дазволіць Украіне папоўніць запасы ўзброеных сілаў, эфектыўна супрацьстаяць расейскім атакам на лініі фронту і забяспечыць абарону сваіх гарадоў ад паветраных удараў. Адначасова гэта ўмацуе пазіцыю ЕЗ, які імкнецца ўзяць удзел у перамовах, зазначае выданне.

Тым не менш дэталі еўрапейскага пакету дапамогі яшчэ абмяркоўваюцца, і пакуль не зразумела, ці атрымаецца дасягнуць кансэнсусу сярод усіх чальцоў ЕЗ. Адзін з дыпламатаў адзначыў, што Вугоршчына, верагодна, выкажа нязгоду, што робіць аднагалоснае ўхваленне малаверагодным.

У Эр-Рыядзе 18 лютага прайшлі першыя з пачатку вайны ва Украіне перамовы паміж дэлегацыямі Расеі і ЗША. Удзельнікі пагадзіліся прадоўжыць абмеркаванне пытанняў урэгулявання канфлікту і паляпшэння двухбаковых стасункаў.

Еўрапейскія палітыкі занепакоеныя тым, што пасля заканчэння вайны ЗША ўскладуць на ЕЗ адказнасць за гарантаванне бяспекі ўздоўж лініі размежавання. Гэта можа прывесці да значна большага фінансавага цяжару, чым цяперашнія выдаткі на падтрымку Украіны, піша Financial Times, спасылаючыся на свае крыніцы.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]