Трэнер «Легіі»: Веру, што Шкурын будзе забіваць мячы і цалкам раскрые свой патэнцыял
- 27.02.2025, 10:32
- 1,190

Беларус выступіў у пераможным матчы 1/4 фіналу Кубка Польшчы.
Галоўны трэнер «Легіі» Гансалу Фею пракаментаваў выступ беларускага нападніка Іллі Шкурына ў пераможным матчы 1/4 фіналу Кубка Польшчы супраць «Ягелоніі» (3:1).
Нагадаем, Шкурын дэбютаваў у стартавым складзе і быў заменены на 66-й хвіліне, галявымі дзеяннямі не вызначыўся.
«Ці не баяўся я, што Ілля можа не даць рады ў «Легіі», як раней у «Ракаве»? Не. Калі прыходзіць новы гулец, мяне суправаджаюць зусім іншыя эмоцыі: давер, вера, падтрымка, максімальная дапамога ў інтэграцыі ў каманду.
Ілля, які гуляе за «Легію», і той, які быў у «Ракове», – гэта два розныя чалавекі. Іх нельга параўноўваць, у тым ліку ў спартыўных прычынах. Сістэма зусім іншая.
Шкурын вызначана стаў больш дасведчаным дзякуючы сезонам у Экстракласе, забітым мячам, гульнявым хвілінам. Нядаўна ён дэбютаваў, а ў сераду ўпершыню выйшаў у стартавым складзе ў вельмі складаны момант для каманды. Былі як станоўчыя моманты, так і такія, якія можна палепшыць.
Час дазволіць нам і Іллі лепш сыграцца. Веру, што ён будзе забіваць мячы і цалкам раскрые свой патэнцыял, якія ён збольшага прадэманстраваў у матчы з «Ягелоніяй», - сказаў Фею.