Bloomberg: Трамп сутыкнуўся з парадаксальнай рэакцыяй украінцаў
23- 2.03.2025, 14:11
- 54,582
Гэтая дынаміка выявілася адразу пасля спрэчкі ў Авальным кабінеце.
Адміністрацыя прэзідэнта ЗША Дональда Трампа дала зразумець, што разглядае Уладзіміра Зяленскага як перашкоду для надання дапамогі Украіне, аднак сутыкнулася з парадаксальным супрацьстаяннем з боку ўкраінцаў.
Як піша Bloomberg, палітычныя нападкі ЗША на Зяленскага ўзмацніліся пасля пятнічнай сваркі ў Белым доме. Тады Трамп і віцэ-прэзідэнт Джэй Ды Вэнс назвалі Зяленскага непаважлівым і выказалі здагадку, што яго пазіцыя, а не агрэсія Масквы, з'яўляецца перашкодай на шляху да спынення агню з Расеяй.
«Парадокс для Трампа і Вэнса палягае ў тым, што чым больш яны ціснуць на Зяленскага, тым больш украінцаў становяцца на бок свайго прэзідэнта. Гэта дынаміка, якая выявілася на вуліцах Кіева адразу пасля фіяска ў Авальным кабінеце», - піша выданне.
«Трамп хацеў прынізіць нас усіх…Нягледзячы на тое, што я не галасаваў за Зяленскага, мая асабістая падтрымка прэзідэнта пасля гэтага відовішча ўзрасла», - сказаў 52-гадовы фатограф Уладзіслаў Мусіенка.
Кіраўнік узброеных сіл Украіны Генерал Аляксандр Сырскі таксама выказаў сваю падтрымку прэзідэнту, заявіўшы, што вайскоўцы «разам з Вярхоўным галоўнакамандуючым».
Іншае пытанне – як доўга яшчэ людзі будуць заставацца адзінымі ў такой напружанай сітуацыі, адзначае Bloomberg.
Хоць на фронце назіраецца стабілізацыя, расейцы маюць перавагу ў жывой сіле і ўзбраенні. Са слоў крыніц выдання, расейцы таксама ўзмацняюць ціск на інфармацыйную сферу, ствараючы раскол у вайсковых колах, паміж вайскоўцамі і грамадствам, а таксама паміж Украінай і яе партнёрамі.
У той жа час магчымую мірную дамову многія ўкраінцы ўспрымуць складана, і яна будзе патэнцыйна небяспечнай з палітычнага пункту гледжання для таго, хто будзе стаяць ва ўладзе.
«Грамадскія настроі сведчаць аб тым, што нават змена прэзідэнта не абавязкова прывядзе да з'яўлення лідара, больш добразычлівага да Трампа і яго планаў па больш хуткай нармалізацыі стасункаў з Расеяй», - адзначае выданне.
Так, паводле звестак сацапытання групы «Рэйтынг», амаль 83% украінцаў заявілі, што пагадзіліся б на спыненне агню толькі пры ўмове надання гарантый бяспекі - той самы камень спатыкнення, які стаў прычынай сваркі ў Белым доме. Толькі 2% пагадзіліся б на спыненне агню без усялякіх умоў.
Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe
Звязацца з намі можна праз адрас [email protected]
