Трамп хоча закупіць у Фінляндыі ледаколы

Лідары дзвюх краін абмеркавалі ўзмацненне ўплыву ў Арктыцы падчас гульні ў гольф.

Прэзідэнт Фінляндыі Аляксандэр Стуб у суботу, 29 сакавіка, нанёс неафіцыйны візіт прэзідэнту ЗША Дональду Трампу ў Фларыдзе. Лідары дзвюх краін абмеркавалі ўмацаванне двухбаковага партнёрства, вайну ва Украіне і згулялі партыю ў гольф. Сустрэча праходзіла ў прыналежным амерыканскаму лідару гольф-клубе Trump International Golf Club, паведамляе «Нямецкая хваля».

Адной з важных тэм перамоў стаў будучы закуп ЗША ледаколаў для ўзмацнення ўплыву ў Арктыцы. «Прэзідэнт Стуб і я з нецярпеннем чакаем умацавання партнёрства паміж ЗША і Фінляндыяй, уключаючы куплю і распрацоўку вялікай колькасці вельмі неабходных ледаколаў для ЗША, што забяспечыць мір і міжнародную бяспеку для нашых краін і ўсяго свету», - напісаў Трамп на сваёй платформе Truth Social.

Сустрэча Трампа са Стубам адбылася на наступны дзень пасля візіту віцэ-прэзідэнта ЗША Джэй Ды Вэнса на амерыканскую вайсковую базу Пітуфік у Грэнландыі - аўтаномнай тэрыторыі Даніі, якая з'яўляецца блізкім хаўруснікам Фінляндыі ў паўночнай Еўропе. Вэнс абвінаваціў Данію ў недастатковай абароне Грэнландыі. Калі ЗША не праявяць цікавасць да Грэнландыі, то гэта зробяць Расея і Кітай, якія пашыраюць прысутнасць у рэгіёне, заявіў ён.

Дамаганні Трампа на Грэнландыю

Трамп ужо не раз выказваў цікавасць да набыцця Грэнландыі на фоне канкурэнцыі, якая ўзмацняецца ў свеце, за кантроль над Арктыкай. Данія і большасць жыхароў Грэнландыі выступаюць супраць продажу гэтай выспы ЗША. У інтэрв'ю NBC News 29 сакавіка Трамп заявіў, што не выключае «ўжывання ваеннай сілы» для ўстанаўлення кантролю над Грэнландыяй, але мяркуе, што ёсць «добрая магчымасць» дабіцца гэтай мэты без выкарыстання сілы.

На пытанне, які сігнал купля Грэнландыі адправіла б Расеі і свету, Трамп адказаў: «Я пра гэта не думаю. Мяне гэта не хвалюе».

Сусветны лідар у вытворчасці ледаколаў

Фінляндыя з'яўляецца сусветным лідарам у вытворчасці ледаколаў: амаль 80% гэтых суднаў спраектаваныя фінскімі кампаніямі, а блізу 60% пабудаваныя на фінскіх верфях. У лістападзе адміністрацыя былога прэзідэнта ЗША Джо Байдэна, Канада і Фінляндыя падпісалі пагадненне Icebreaker Collaboration Effort для супольнай распрацоўкі арктычных і палярных ледаколаў шляхам абмену ведамі, інфармацыяй і рэсурсамі.

ЗША маюць намер нарасціць ледакольны флот для супрацьстаяння Расеі ў Арктыцы, заявіў у студзені дарадца прэзідэнта ЗША ў нацыянальнай бяспецы Майк Уолц. Ён нагадаў, што Расея валодае больш чым 60 ледаколамі, уключаючы атамныя, тады як у ЗША іх усяго два, і адзін нядаўна выйшаў са строю. «У нас іх два, і адзін нядаўна згарэў», – сказаў Уолц, адзначыўшы, што Кітай таксама актыўна будуе ледаколы і пашырае сваю прысутнасць у рэгіёне.

Цяпер адзіны дзейны ледакол ЗША – Polar Star, пабудаваны ў 1976 годзе. Другі ледакол Polar Sea не выкарыстоўваецца з 2010 года праз паломку рухавіка. Трэці ледакол Healy, уведзены ў эксплуатацыю ў 1999 годзе, у 2020 годзе атрымаў сур'ёзныя пашкоджанні праз пажар і быў адпраўлены на рамонт.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com