Сіноптыкі паабяцалі беларусам «снежаньскае» надвор'е ў пачатку красавіка

Беларусь можа накрыць сур'ёзная хваля холаду са значнымі начнымі замаразкамі.

Да канца сакавіка ў Беларусі ўстанавілася па-сапраўднаму вясновае надвор'е: дзённыя максімумы выходзілі далёка за дзесяціградусную адзнаку, начныя мінусы практычна сышлі з аператыўных прагнозаў і, здаецца, зіма зусім адступіла. Аднак, спецыялісты папярэдзілі: канчаткова перабудоўвацца на «летні рэжым» пакуль рана. Як паказалі сярэднетэрміновыя прагнозы сіноптыкаў, у пачатку красавіка Беларусь можа накрыць сур'ёзная хваля холаду з рэзкімі начнымі замаразкамі.

Журналісты Telegraf.news даведаліся, да якога часу беларусам не варта прыбіраць на антрэсолі зімовую вопратку і калі, нарэшце, аўтамабілісты змогуць смела «пераабуцца» без асцярогі ранішняга галалёду.

Так, аўтары тэматычнага Telegram-канала @nadvorie паведамілі, што цяпер на Беларусь марудна насоўваецца новы антыцыклон, цэнтр якога размяшчаецца над паўночнай Еўропай. За ім тэрыторыя нашай краіны на нейкі час можа патрапіць у «вышынную лагчыну», праз што да нас пачне паступаць холад з поўначы Расеі. З прагнозаў спецыялістаў, цёплы перыяд скончыцца ўжо ў пятніцу, 4 красавіка.

«Тэмпература істотна панізіцца. Вернуцца начныя маразы, а ападкі будуць у выглядзе мокрага снегу. Папярэдне, халодны перыяд прадоўжыцца да 7 красавіка, а можа і даўжэй», - папярэдзілі аўтары канала.

Вывучыўшы звесткі мадэлі прагназавання GFS, спецыялісты адзначылі, што «хвост у мадэлі моцна пахаладзеў» і з 5 красавіка беларусам можна чакаць устанаўлення «цалкам сабе снежаньскага надвор'я».

Якім будзе красавік-2025 у Беларусі?

Падобны прагноз агучыў напярэдадні ў эфіры дзяржтэлеканала ОНТ і вядомы беларускі сіноптык Дзмітрый Рабаў. З яго слоў, на гэтым тыдні ў большасці дзён «будзе пераважаць антыцыкланічны характар надвор'я». Прасцей гаворачы, істотных ападкаў у гэтыя дні не чакаецца. Рабаў спрагназаваў беларусам на наступным тыдні цёплае, сонечнае, камфортнае і пераважна сухое надвор'е. А вось бліжэй да выхадных, з яго слоў, чакаецца пахаладанне. Зрэшты, начных маразоў у яго прагнозах няма.

Спецыяліст агучыў і больш доўгатэрміновы папярэдні прагноз на красавік. З яго слоў, у красавіку вясна «будзе актыўна набіраць абароты». Паводле яго слоў, у першай дэкадзе месяца можна чакаць сярэдняй тэмпературы паветра на 2-4°C вышэйшай за кліматычную норму.

Адзначым, што паводле звестак Белгідрамета, кліматычная норма для другога вясновага месяца ў Беларусі складае +7,8°С. Такім чынам, калі прагноз Рабава апраўдаецца, сярэдняя тэмпература ў пачатку красавіка ў 2025 годзе ў Беларусі будзе трымацца ў дыяпазоне +9,8…+11,8°С.

Аператыўны прагноз ад Белгідрамета

Нагадаем, доўгатэрміновыя прагнозы, як правіла, недакладныя, бо метэаралагічныя ўмовы залежаць ад мноства фактараў і зменных, якія ўвесь час змяняюцца, таму спецыялісты стала карэктуюць і ўдакладняюць доўгатэрміновыя прагнозы. Максімальна дакладнымі ў метэаралогіі ўважаюцца толькі аператыўныя і кароткатэрміновыя прагнозы - на найбліжэйшыя тры дні.

Так, прагноз Белгіламета на 31 сакавіка і 1-2 красавіка сведчыць аб тым, што новы працоўны тыдзень сустрэне беларусаў хоць і воблачным, але дастаткова цёплым надвор'ем. Паводле інфармацыі ведамства, у панядзелак, 31 сакавіка, надвор'е ў Беларусі будзе вызначаць вобласць падвышанага атмасфернага ціску і няўстойлівая паветраная маса. Яна можа прынесці невялікія кароткачасовыя дажджы ў асобныя раёны. У аўторак, 1 красавіка, дажджы Белгідрамет спрагназаваў для большай часткі тэрыторыі краіны ўначы, а ўдзень — галоўным чынам па Берасцейскай і Гомельскай абласцях. Дажджы на паўднёвым усходзе краіны Белгідрамет спрагназаваў і ў ноч на 2 красавіка, прычым з паўночным сярэднім і нават парывістым ветрам.

Што да тэмпературы паветра, на найбліжэйшыя тры дні прагноз Белгідрамета наступны:

31 сакавіка: уначы +1..+7°С, максімальная ўдзень +10..+16°С;

1 красавіка: уначы +2..+8°С, максімальная ўдзень +11..+17°С (на паўднёвым усходзе — толькі +9..+10°С);

2 красавіка: уначы +1..+7°С (на поўначы магчымыя замаразкі да 0..-1°С), максімальная ўдзень +12..+18°С.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com