Міністр абароны ФРГ: Мы цвёрда стаім на баку Украіны

Нямеччына хоча кампенсаваць спыненне дапамогі ЗША Кіеву.

Нямеччына і іншыя краіны, якія падтрымліваюць Украіну, маюць намер, паводле словаў міністра абароны ФРГ Барыса Пісторыюса, у значнай ступені кампенсаваць недастатковую дапамогу з боку ЗША. «Мы, вядома, імкнемся кампенсаваць спыненне амерыканскай падтрымкі за кошт новых захадаў дапамогі, прынамсі ў значнай ступені», – заявіў Пісторыюс у чацвер, 6 сакавіка, падчас візіту міністра абароны Украіны Рустэма Умерава ў Берлін. Ён, сярод іншага, паабяцаў Кіеву артылерыйскія снарады і сродкі сувязі, такія як амерыканская спадарожнікавая сетка Starlink, паведамляе DW.

Пісторыюс раскрытыкаваў ЗША за тое, што тыя, паводле ягоных словаў, «практычна на хаду» і «раптоўна» прыпынілі ваенную дапамогу Украіне. У той самы час ён падкрэсліў, што Нямеччына «па-ранейшаму цвёрда стаіць на баку Украіны, і цяпер гэта важна як ніколі». Міністр абароны ФРГ таксама заявіў, што Берлін прадоўжыць рабіць упор на ўзмацненне супрацьпаветранай абароны Украіны і яе сухапутных войскаў.

Ён адзначыў, што нямецкія пастаўкі ажыццяўляюцца «стала і надзейна». «Калі мы нешта абвяшчаем і вылучаем на гэта сродкі, то гэта будзе пастаўлена», – запэўніў Пісторыюс. У сувязі з гэтым ён нагадаў пра пагадненне паміж меркаванымі партнёрамі будучай кіроўнай кааліцыі ў ФРГ – блокам хрысціянскіх партый ХДЗ/ХСЗ і сацыял-дэмакратамі, паводле якога ўсе выдаткі на абарону, якія перавышаюць 1% ВУП, не будуць падпадаць пад дзеянне бюджэтнага абмежавання на запазычанні (так званага «пазыковага тормазу»). Гэта фактычна азначае неабмежаваныя крэдыты для фінансавання бундэсвера.

Паводле словаў Барыса Пісторыюса, Нямеччына ў гэты «вызначальны момант» для Украіны цесна каардынуе свае дзеянні з еўрапейскімі партнёрамі. Каб узгадніць захады кампенсацыі адсутнай амерыканскай дапамогі, Пісторыюс дамовіўся са сваім брытанскім калегам Джонам Хілі пра тое, што яны супольна прадоўжаць кіраўніцтва Кантактнай групай ва Украіне. Наступная сустрэча знаходзіцца ўжо ў стадыі планавання.

«Мы прадоўжым актыўна падтрымліваць Украіну, каб яна нават у гэты складаны час захоўвала пазіцыю сілы і магла дзейнічаць з гэтай пазіцыі», – падкрэсліў Пісторыюс.

Са свайго боку міністр абароны Украіны Рустэм Умераў зазначыў, што Нямеччына ўжо вылучыла ягонай краіне ваенную дапамогу памерам 20 млрд еўраў. Гэта складае 37 адсоткаў ад усёй еўрапейскай дапамогі і 16 адсоткаў ад ваеннай дапамогі з боку ўсіх краінаў. Умераў адзначыў, што нямецкая дапамога мае ключавое значэнне, асабліва для абароны Украіны ад паветраных атак.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]