Лукашэнкаўскія генералы пад пагрозай

Хаўруснік можа ім зрабіць непрыстойную прапанову.

Генерал Муравейка — галоўны ў ваенных стратэгіях (не блытай з тактыкамі) — сказаў, што ў Беларусі вельмі добрае войска. А ведаеш чаму? Таму што беларускае войска ні з кім не ваявала. І, пагадзіся, што толькі гэта лагічна. Таму што якое войска – непераможнае? Тое, якое ніхто не перамагаў.

Вось генерала Муравейку ніхто не перамагаў, таму генерал Муравейка - непераможны. А разам з ім і ўсё астатняе беларускае войска. Бо іншыя беларускія генералы яны ж не горшыя за генерала Муравейку. Астатніх беларускіх генералаў таксама ні разу не перамагаў ніводны ўмоўны супраціўнік. А генералы ўмоўнага супраціўніка заўсёды перамагалі.

Апошні раз літаральна днямі, калі яны правяралі сваю боегатоўнасць і падумалі, што боегатоўнасць у іх добрая. Такую боегатоўнасць дай Бог кожнаму. Але не ў кожнага такая боегатоўнасць ёсць.

І калі ты раптам не ў курсе, то менавіта таму на беларускіх генералаў ніхто да гэтага часу не напаў. Праз іх высокую боегатоўнасць, а не праз тое, пра што ты можа падумала. Але табе так думаць даравальна. Ты ў стратэгіях не разбіраешся.

А беларускія генералы разбіраюцца. Таму беларускія генералы апошнім часам вельмі хвалююцца, што Польшча неабгрунтавана і правакацыйна ўмацоўвае мяжу з Беларуссю. А навошта ўмацоўвае? Каб напасці на беларускіх генералаў. Бо межы ж умацоўвае для нападу. Закладваюць наступальныя міны і капаюць мабільныя супрацьтанкавыя равы. І калі б ты разбіралася ў стратэгіях як беларускія генералы, ты б таксама пра гэта ведала.

Бо ў свеце беларускіх генералаў зноў неспакойна. Хаця ў свеце беларускіх генералаў стабільнасці ў прынцыпе няма. Затое ёсць умоўны супраціўнік па ўсім генеральскім перыметры. А такі перыметр, як у некаторых беларускіх генералаў, не ў кожнага знойдзеш.

Але ў апошні час гэтаму перыметру ўмоўны супраціўнік зноў пачаў пагражаць часцей чым раней. Ну не дарма ж генералы надумалі праверыць сваю боегатоўнасць, правільна? Калі б умоўны супраціўнік ім не пагражаў, дык яны б і не правяралі. А калі правяраюць, значыць ёсць пагроза.

І я нават падазраю, навошта менавіта гэтая пагроза беларускім генералам зараз пагражае. Злыя языкі кажуць, што ў хаўрусніка справы на фронце пайшлі такім чынам, што супольніку хутка не будзе чым, а можа і кім ваяваць. Таму беларускія генералы асцерагаюцца, што супольнік можа ім зрабіць непрыстойную прапанову, аж да праверкі стану генеральскай боегатоўнасці ў ваенна-палявых умовах. Я не кажу, што хаўруснік збіраецца. Я кажу, што генералы маюць такія асцярогі.

Таму боегатоўнасць лепш праверыць загадзя. Таму што калі пераканаўча адбіць нябачную пагрозу, то можна будзе і далей абараняць саюзніцкія флангі ад умоўнага супраціўніка. Галоўнае, каб на безумоўнага супраціўніка неспадзявана не паслалі. А ўжо з умоўным і пажадана бяззбройным супраціўнікам беларускія генералы самі разбяруцца.

Telegram-канал "Лісты да дачкі"

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com